កំពង់ធំ៖ សម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទីនៃព្រះរាជាណាចក្រកម្ពុជា និងជាប្រធានក្រុមឧត្តមប្រឹក្សាផ្ទាល់ព្រះមហាក្សត្រ នៅព្រឹកថ្ងៃទី៣ ខែមិថុនា ឆ្នាំ២០២៦ បានអញ្ជើញជួបសំណេះសំណាលជាមួយក្រុមប្រឹក្សាខេត្ត ក្រុង ស្រុក ឃុំ សង្កាត់ និងថ្នាក់ដឹកនាំមន្ទីរ-អង្គភាពនានាក្នុងខេត្តកំពង់ធំ ក្នុងគោលបំណងពង្រឹងការអនុវត្តការងារមូលដ្ឋាន ការផ្តល់សេវាសាធារណៈ និងការបម្រើប្រជាពលរដ្ឋឱ្យកាន់តែមានប្រសិទ្ធភាព។
ពិធីជួបសំណេះសំណាលនេះ បានប្រព្រឹត្តទៅក្នុងបរិយាកាសស្និទ្ធស្នាល និងពោរពេញដោយអត្ថន័យ ដោយមានការចូលរួមពីសមាជិកព្រឹទ្ធសភា រដ្ឋសភា ថ្នាក់ដឹកនាំក្រុមការងារថ្នាក់ជាតិ សមាជិកក្រុមប្រឹក្សាខេត្ត ក្រុង ស្រុក ឃុំ សង្កាត់ ព្រមទាំងថ្នាក់ដឹកនាំមន្ទីរ និងអង្គភាពពាក់ព័ន្ធជាច្រើន សរុបប្រមាណ១,៥០០នាក់។
ក្នុងឱកាសនោះ សម្តេចតេជោ ហ៊ុន សែន បានគូសបញ្ជាក់ថា ដំណើរចុះជួបសំណេះសំណាលជាមួយថ្នាក់ដឹកនាំមូលដ្ឋាននៅទូទាំងប្រទេស គឺជាផ្នែកមួយនៃ «ដំណើរឆ្ពោះទៅកាន់មូលដ្ឋាន» ដែលបានចាប់ផ្តើមតាំងពីថ្ងៃទី២៥ ខែមេសា ឆ្នាំ២០២៦ ដើម្បីស្តាប់មតិយោបល់ ស្វែងយល់ពីស្ថានភាពជាក់ស្តែង និងពង្រឹងប្រសិទ្ធភាពការងាររបស់អាជ្ញាធរគ្រប់លំដាប់ថ្នាក់។ មកដល់ពេលនេះ សម្តេចបានអញ្ជើញជួបសំណេះសំណាលនៅរាជធានី-ខេត្តចំនួន១១រួចមកហើយ ខណៈខេត្តកំពង់ធំគឺជាគោលដៅបន្ទាប់ក្នុងដំណើរបំពេញបេសកកម្មនេះ។
សម្តេចតេជោ បានក្រើនរំលឹកដល់ថ្នាក់ដឹកនាំ និងមន្ត្រីមូលដ្ឋានទាំងអស់ឱ្យបន្តលើកកម្ពស់ស្មារតីទទួលខុសត្រូវ និងការបម្រើប្រជាពលរដ្ឋ ដោយផ្តោតសំខាន់លើការផ្តល់សេវាសាធារណៈឱ្យបានឆាប់រហ័ស តម្លាភាព និងមានប្រសិទ្ធភាព ព្រមទាំងយកចិត្តទុកដាក់ដោះស្រាយបញ្ហា និងសំណូមពររបស់ប្រជាពលរដ្ឋនៅមូលដ្ឋានឱ្យទាន់ពេលវេលា។
ក្រៅពីការងារផ្តល់សេវាសាធារណៈ សម្តេចតេជោ ក៏បានលើកឡើងអំពីសារៈសំខាន់នៃការពង្រឹងសន្តិសុខ សណ្តាប់ធ្នាប់សាធារណៈ ការប្រយុទ្ធប្រឆាំងបទល្មើសគ្រប់ប្រភេទ ការអភិរក្សធនធានធម្មជាតិ និងការគ្រប់គ្រងរដ្ឋបាលសាធារណៈនៅថ្នាក់មូលដ្ឋានឱ្យកាន់តែមានប្រសិទ្ធភាព ស្របតាមគោលនយោបាយរបស់រាជរដ្ឋាភិបាល។
ជាមួយគ្នានេះ សម្តេចតេជោ ក៏បានបង្ហាញការកត់សម្គាល់ចំពោះការរីកចម្រើនរបស់ខេត្តកំពង់ធំ ដែលជាខេត្តស្ថិតនៅចំកណ្តាលប្រទេស និងមានសក្តានុពលខ្ពស់លើវិស័យកសិកម្ម កសិ-ឧស្សាហកម្ម ទេសចរណ៍ និងការវិនិយោគ។ ក្នុងរយៈពេលប៉ុន្មានឆ្នាំចុងក្រោយនេះ ខេត្តកំពង់ធំទទួលបានគម្រោងអភិវឌ្ឍន៍ជាច្រើន ទាំងវិស័យសាធារណៈ និងឯកជន ដែលបានរួមចំណែកធ្វើឱ្យមុខមាត់ខេត្តមានការផ្លាស់ប្តូរគួរឱ្យកត់សម្គាល់។
ហេដ្ឋារចនាសម្ព័ន្ធសំខាន់ៗជាច្រើន រួមមានផ្លូវថ្នល់ ស្ពាន ប្រព័ន្ធធារាសាស្ត្រ សាលារៀន មន្ទីរពេទ្យ និងគម្រោងអភិវឌ្ឍន៍នានា កំពុងត្រូវបានសាងសង់ និងកែលម្អជាបន្តបន្ទាប់។ ទន្ទឹមនឹងនេះ ក្រុងស្ទឹងសែន ដែលជាបេះដូងសេដ្ឋកិច្ច និងរដ្ឋបាលរបស់ខេត្ត ក៏កំពុងប្រែមុខមាត់ថ្មី តាមរយៈការរៀបចំសោភ័ណភាពទីក្រុង ការអភិវឌ្ឍច្រាំងស្ទឹង ផ្លូវដើរសាធារណៈ កន្លែងហាត់ប្រាណ និងផ្សាររាត្រី ដើម្បីលើកកម្ពស់ជីវភាពប្រជាពលរដ្ឋ និងទាក់ទាញភ្ញៀវទេសចរ។
សម្តេចតេជោ ហ៊ុន សែន បានគូសបញ្ជាក់ថា ការចុះជួបផ្ទាល់ជាមួយថ្នាក់ដឹកនាំមូលដ្ឋាន គឺជាយន្តការសំខាន់ក្នុងការពង្រឹងគណនេយ្យភាព និងការទំនាក់ទំនងរវាងថ្នាក់ជាតិ និងថ្នាក់ក្រោមជាតិ ព្រមទាំងជាឱកាសសម្រាប់ចែករំលែកព័ត៌មានអំពីស្ថានភាពជាតិ និងអន្តរជាតិ ដើម្បីធានាថាការអនុវត្តការងារនៅមូលដ្ឋានមានទិសដៅច្បាស់លាស់ និងឆ្លើយតបតម្រូវការជាក់ស្តែងរបស់ប្រជាពលរដ្ឋ។
តាមរយៈជំនួបសំណេះសំណាលនេះ សម្តេចតេជោ បានបន្តជំរុញឱ្យអាជ្ញាធរ និងមន្ត្រីគ្រប់លំដាប់ថ្នាក់បង្កើនការយកចិត្តទុកដាក់លើតួនាទី និងភារកិច្ចរបស់ខ្លួន ដោយប្រកាន់ខ្ជាប់នូវគោលការណ៍បម្រើប្រជាពលរដ្ឋជាស្នូល ដើម្បីរួមចំណែករក្សាសុខសន្តិភាព ស្ថិរភាពសង្គម និងជំរុញការអភិវឌ្ឍប្រកបដោយចីរភាពនៅមូលដ្ឋាន និងទូទាំងប្រទេស។
